«ՄԻՊ-ը դարձել է գիտահետազոտական-միտահետազոտական հիմնարկ»․ Ռուբեն Մելիքյան

Փաստաբան Ռուբեն Մելիքյանի ֆեյսբուքյան գրառումը․ «Զգացե՞լ եք՝ մարդու իրավունքների բացահայտ ու կոպիտ խախտում արձանագրելիս այլևս գրեթե ոչ ոք չի հիշում ՄԻՊ կառույցը։ Այն պարզապես մոռացվել է։ Դարձել է գիտահետազոտական-միտահետազոտական հիմնարկ։ Ուստի զուտ մարզական հետաքրքրությունից դրդված՝ որոշեցի ստուգել նրանց պաշտոնական էջը ու պարզվեց՝ ինչ-որ հերթապահ, անհետաքրքիր հայտարարություն են կատարել՝ դատապարտելով բռնությունը։ Ընդ որում, չգիտես ինչու, նաև կոչ են անում մեզ բոլորիս զերծ մնալ «ատելություն, անհանդուրժողականություն ու բռնություն հրահրող խոսքից ու վարքագծից»։
Ի՞նչ է դա նշանակում։ Դա նշանակում է, որ էժան ձևով տպավորություն են ստեղծում, որ միջադեպի պատճառը ոչ թե Արթուրի կատարած կոռուպցիոն բացահայտումներն են, այլ նրա իբր «հրահրող» խոսքն ու վարքը։ Ահա՛ հայտարարության բուն իմաստը։
Կարճ ասած՝ եթե մի օր ՄԻՊ-ի պաշտոնը զբաղեցնող անձին տեսնեք «Հանրապետություն» կուսակցության ավագանու հայտնի անդամի աթոռում, իսկ այդ կնոջը՝ ՄԻՊ-ի աթոռում, ապա չզարմանաք. կարող եք համարել, որ պետական ապարատում ոչինչ էլ չի փոխվել»։