Ուկրաինայի Սումիի մարզում 213 բնակավայր տարհանվում է

Ուկրաինայի Սումի մարզի իշխանությունները քաղաքացիների պարտադիր տարհանում են իրականացնում ևս 11 բնակավայրերում։ ՌԲԿ-ի հաղորդմամբ այս մասին իր ֆեյսբուքյան էջում հայտնել է տարածաշրջանային ռազմական վարչակազմի ղեկավար Օլեգ Գրիգորովը։

Խոսքը վերաբերում է Վորոբյովկայի, Շտանովկայի, Վորոնովկայի, Յանչենկոյի, Ցիմբալովկայի, Շկուրատովկայի, Կրովնոյեի, Նիկոլաևկայի, Ռուդնովկայի, Սպասկոյեի և Կապիտանիովկայի գյուղերի մասին:

Գրիգորովը հայտնել է, որ պարտադիր տարհանման ենթակա է ընդհանուր առմամբ 213 բնակավայր, հավելելով, որ գոտին ընդլայնվել է հրետակոծության պատճառով: «Բոլոր նրանց, ովքեր օգնության կարիք ունեն, տրամադրվում է տրանսպորտ, մարդասիրական օգնություն, ժամանակավոր կացարան և սոցիալական վճարումներ», - գրել է նա: Մեկ շաբաթ առաջ տարհանում էր հայտարարվել Ռուսաստանին սահմանակից 200 բնակավայրերում, որտեղ ապրում է ավելի քան 4000 մարդ: Գրիգորովի խոսքով՝ այդ պահին բնակչության ավելի քան 60%-ը լքել էր այն: