Չինական մարսագնացը պարզել է, որ 750 միլիոն տարի առաջ Մարսի վրա դեռ ջուր է եղել

Չինացի երկրաբանները, «Չժուժուն» մարսագնացի տվյալները վերլուծելուց հետո, եզրակացրել են, որ Մարսի մակերևույթին մոտ 750 միլիոն տարի առաջ դեռևս գոյություն է ունեցել ջուր, հաղորդում է Xinhua-ն։

Չինաստանի գիտությունների ակադեմիայի երկրաբանության և երկրաֆիզիկայի ինստիտուտի մասնագետների կողմից անցկացված ուսումնասիրությունը ցույց է տվել, որ Կարմիր մոլորակի վրա ջրի զգալի ծավալներ գոյություն են ունեցել մի քանի հարյուր միլիոն տարի ավելի երկար, քան նախկինում կարծում էին։

Մարսագնացի վայրէջքի վայրում հայտնաբերվել է մոտ 4 մետր հաստությամբ միատարր նստվածքային շերտ, որի տակ գտնվում են խառնարաններ։ Այս շերտի հավասարաչափ հաստությունն ու շարունակականությունը, գիտնականների կարծիքով, վկայում է այն մասին, որ տվյալ տարածքը ժամանակին եղել է ջրային միջավայրում, որը հիշեցնում էր մակերեսային ծով կամ մեծ լիճ։

Նշվում է, որ տվյալների համապարփակ վերլուծությունը ցույց է տալիս մոտ 750 միլիոն տարի առաջ մարսագնացի վայրէջքի տարածքում մշտական ​​ջրային ակտիվության առկայությունը։

Ավելի վաղ գիտնականները կարծում էին, որ Մարսը զարգացման չոր փուլ է անցել մոտ 3 միլիարդ տարի առաջ։