«Եթե պետությունը սկսում է նվաստացնել, ցուցադրել, դա դառնալու է կառավարման մշակույթ»․ Զառա Հովհաննիսյան

Իրավապաշտպան, հրապարակախոս Զառա Հովհաննիսյանի ֆեյսբուքյան գրառումը. «Հանրային գիտակցության վրա ծանր ազդեցություն թողեցին այն տեսարանները, որոնք ուղեկցեցին Գագիկ Ծառուկյանի ձերբակալությանն ու խուզարկություններին։ Դիմակավորված հատուկ ստորաբաժանումների ներխուժումը, փաստացի դիմադրություն չցուցաբերող անձին գետնին պառկեցնելը, բաց ձեռնաշղթաներով ցուցադրական տեղափոխումը, տեսախցիկների առջև իրականացվող ամբողջ գործընթացը դժվար է ընկալել բացառապես որպես անհրաժեշտ դատավարական գործողություններ։ Դրանք ավելի շատ հիշեցնում էին ուժի ցուցադրություն, քան իրավական անհրաժեշտություն։
Եթե պետությունը սկսում է նվաստացնել, ցուցադրել, վախեցնել և իրավական անհրաժեշտությունը փոխարինել քաղաքական կամ հանրային ներկայացմամբ, վաղ թե ուշ այդ նույն գործիքակազմը դուրս է գալու մեկ անձի գործի սահմաններից և դառնալու է կառավարման մշակույթ»։