«Սա երկրորդ շանսն է, որտեղ իրոք կարող են լուրջ որոշումներ կայացվել»․ Վահան Բաբայան

Ռեֆորմիստների կուսակցության նախագահ Վահան Բաբայանը ֆեյսբուքյան իր էջում գրել է․ «Ինչպես և գրել էի օրեր առաջ՝ Բիշքեկում որևէ բեկումնային բան չի լինելու, այդպես էլ եղավ: Պետք է արձանագրենք, որ Մոսկվան շատ պրագմատիկ է նայում այն իրավիճակին, որն ունենք, բայց միաժամանակ հասկացնում է, որ եթե դու մեր հետ չես՝ մեզանից չես էլ կարող օգտվել: Սա կյանքի օրենք է և ոչ միայն քաղաքական:
ՌԴ նախագահ Վլադիմիր Պուտինը հստակ նշեց, որ հայ ժողովուրդն է որոշողը՝ ուզում է մնալ, թե գնալ, հետևաբար միայն ժողովուրդը կարող է պատասխանել այս գլոբալ հարցին: Իսկ կկարողանա Հայաստանի իշխանությունն անցկացնել հանրաքվե և ստանալ մեծամասնության կողմ ձայները ԵԱՏՄ դուրս գալու հարցում կամ ԵՄ մտնելու հարցում, կարծում եմ՝ անհայտ է:
Միակ բանը, որը նորություն էր այս համատեքստում, դա Պուտին-Փաշինյան սպասվող նոր հանդիպումն է, որը կայանալու է Մոսկվայում, սա երկրորդ շանսն է, որտեղ իրոք կարող են լուրջ որոշումներ կայացվել:
Մի բանը ակնհայտ է, ո՛չ Ռուսաստանը, ո՛չ էլ Հայաստանը չեն կարող փոխել իրենց պատմությունն ու անցած ճանապարհը, մենք բարեկամ ժողովուրդներ ենք և պետք է շարունակենք այդ բարեկամությունը»: