«Հայկական կողմը չի արձագանքում Վերա Աղասյանի դին փոխանցելու հարցին»․ Հասանով

Հայկական կողմը չի արձագանքում Վերա Աղասյանի դին տեղափոխելու հարցին, ԱՊԱ-ի փոխանցմամբ՝ այս մասին հայտարարել է Ադրբեջանի պետական ​​անվտանգության ծառայության պետի տեղակալ Շարաֆաթ Հասանովը։

«Անցյալ տարվա հոկտեմբերի 20-ին Խանքենդի (Ստեփանակերտ-խմբ․) քաղաքում հիվանդության պատճառով մահացած 1954 թվականին ծնված Վերա Աղասյանի զավակները ԿԽՄԿ-ի միջոցով տեղեկացվել են նրա մահվան մասին, կատարվել են անհրաժեշտ փաստաթղթային ընթացակարգերը՝ կնոջ դին տեղափոխելու համար, և անգամ ընթացիկ տարվա փետրվարին հարցն ուղղակիորեն ներկայացվել է հայկական կողմի ուշադրությանը։ Սակայն հայկական կողմը գրեթե 5 ամիս է՝ ոչ մի կերպ չի արձագանքում»,- հայտնել է Հասանովը։

Հիշեցնենք, որ Աղասյանը մահացել էր անցյալ տարվա հոկտեմբերի 23-ին։ Նշանակված դատաբժշկական փորձաքննության տվյալներով, ըստ ադրբեջանցիների, 70-ամյա կնոջ մահվան պատճառ էր դարձել սիրտ-թոքային սուր անբավարարությունը։ Ըստ Բաքվի, ԿԽՄԿ-ի ադրբեջանական պատվիրակությանը խնդրել են տեղի ունեցածի մասին տեղյակ պահել Աղասյանի ընտանիքի անդամներին ու Հայաստանի պետական մարմիններին։