«Հայաստանը պետք է ապաշրջափակվի, բայց չի կարող հավակնել խաչմերուկի դերին»․ Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը․ «Հայաստանի վերջին տասնամյակների, գուցե հարյուրամյակների առասպելներից մեկն այն է, որ իբր մեր հանրապետությունը՝ լինի այսօրվա, խորհրդային, Առաջին, ցարական շրջան՝ Արևելյան Հայաստան, աշխարհաքաղաքական կարևոր խաչմերուկ է:
Իրականությունից զուրկ այս պնդումը իրատեսության հետ որևէ աղերս չունի և միայն ու միայն խանգարել է մեր դիվանագիտությանն ու քաղաքական մտածողությանը:
Եթե անգամ բացվեն Ադրբեջանի և Թուրքիայի ճանապարհները, եթե անգամ վերականգնվեն երկաթուղիները, անգամ այդ դեպքում Հայաստանը չի կարող հավակնել խաչմերուկի հավակնոտ դերին:
Նայե՛ք քարտեզին, ուսումնասիրե՛ք ճանապարհներն ու երկաթուղիները, համեմատե՛ք դրանք հարևան պետությունների ենթակառուցվածքների հետ:
Անշուշտ, Հայաստանը պետք է բացվի, պետք է բացված լիներ, սակայն, ցավոք, մենք ամեն ինչ արել ենք, որ դրա հույսը չլինի:
Փակ Հայաստանը բխում է Ռուսաստանի, Թուրքիայի, Ադրբեջանի և այլ երկրների շահերից, հետևաբար, եթե մենք ուզում ենք մեր սերունդներին փոխանցել ավելի մրցունակ Հայաստան, ապաշրջափակումն այլընտրանք չունի:
Ի՞նչ գնով, այլ թեմա է և կարևոր:
Բայց քանի դեռ մենք մեր ներսում չենք համոզվել, որ շրջափակված Հայաստանը չի կարող լինել կենսունակ, լուծումներ չենք փնտրելու»: