Անհայտ բարերարը ցանկություն է հայտնել վերանորոգել Երևանի «Կարմիր կամուրջը» 

Օրերս ՀՀ կրթության, գիտության, մշակույթի և սպորտի նախարարության ու մի անհայտ բարերարի միջև կնքվել է հուշագիր՝ Երևան քաղաքի Կենտրոն վարչական շրջանի տարածքում գտնվող «Կարմիր կամուրջ» հուշարձանի ամրակայման, նորոգման և վերականգնման աշխատանքներում համագործակցության վերաբերյալ: Հուշագիրն ստորագրվել է նախարարի տեղակալի և բարերարի ներկայացուցչի կողմից:
Վերանորոգման աշխատանքները կսկսվեն 2023 թվականին։
Ըստ պատմական աղբյուրների, Երևանի Հրազդան գետի վրա երեք կամուրջ է եղել: Դրանցից Կարմիր անունը ստացած կամուրջը դեռևս 1655 թվականին նկարել է ֆրանսիացի ճանապարհորդ Ժան Տավերնիեն, ըստ որի, կամուրջն ունեցել է երեք կամար:

Սակայն 1679 թվականին տեղի ունեցած ուժգին երկրաշարժի պատճառով Հրազդանի խոր ձորում գտնվող կամուրջն ավերվել և հետագայում վերանորոգվել է մեծահարուստ վաճառական ու բարերար Խոճա Փիրավի բարերարությամբ, որի շնորհիվ կամուրջը ստացել է նաև Խոճա Փիրավի կամուրջ անունը:

Նոր կամուրջը գրեթե նույնությամբ կրկնում է մինչ երկրաշարժը կառուցված կամուրջը՝ միայն թե երեքի փոխարեն ստացել է չորս կամար, որոնցից երկու կենտրոնականները մեծ են, և դրանց միջով հոսում է գետը, իսկ 2-ը փոքր են՝ համեմատաբար բարձրադիր։ Դրանց միջով անցնում են մոտակա հանդամասերը ոռոգող ջրանցքները։ Կամրջի երկարությունը 87,5 մ է, լայնությունը՝ 6,47 մ է, բարձրությունը՝ 11մ :
Կարմիր տուֆից կառուցված կամուրջն այսօր կիսավեր վիճակում է: