«Ուղիղ 2 տարի է՝ նիկոլական վարչախումբն Արմենին պահում է անազատության մեջ»․ Արմեն Հովասափյան

ՀՀԿ խորհրդի անդամ Արմեն Հովասափյանի ֆեյսբուքյան գրառումը․ «Ուղիղ երկու տարի է, ինչ Արմենին նիկոլական վարչախումբը ապօրինաբար պահում է անազատության մեջ։ Իրավական որևէ հիմնավորում չունեցող և բացառապես քաղաքական հաշվեհարդարի փաթեթում մատուցվող այս «գործը» դեռ երկար կմնա մեր պետության թե՛ քաղաքական, թե՛ իրավական պատմության ամոթալի էջերում։
Բնական էր, որ խորքային և հիմնավորված քննադատություն իրականացնող, նիկոլական բուրգը գաղափարական ու փաստարկային կերպով օրեցօր քանդող գործիչը պետք է դառնար համար մեկը թիրախը։ Ավելին, անցած երկու տարին փաստեցին՝ Նիկոլի գրպանի իրավապահները որքան ջանասիրությամբ են կատարում իրենց քաղաքական պատվերը՝ ամեն գնով պահելով Արմենին կալանքի տակ։
Այս համակարգային չարիքից ազատվելու հրամայականը օր առաջ լուծում պահանջող խնդիր է։ Իսկ այլ թեմաներով օրակարգից շեղվելը՝ ոչ այլ ինչ է, քան ջուր լցնել հակահայի ջրաղացին։
Համբերություն քեզ, ընկեր ջան։ Պինդ եղիր։ Հայաստանում դեռ արև է ծագելու»։