«Պետք է պաշտպանենք Արցախի մշակութային ժառանգությունը, բարձրաձայնենք արցախցիների իրավունքների մասին»․ «Ապրելու երկիր»

«Ապրելու երկիր» կուսակցության ուղերձը՝ Արցախի Հանրապետության անկախության օրվա առթիվ․

«Սիրելի՛ հայրենակիցներ
Արցախի կորստից հետո մենք շարունակում ենք ամեն տարի՝ սեպտեմբերի 2-ին, նշանավորել հայկական երկրորդ հանրապետության անկախության հռչակման օրը՝ ի հիշատակ պատմական հայրենիքի պաշտպանության համար նահատակված մեր հերոսների, ի նշան երախտագիտության՝ նրա լինելիության համար պայքար մղած բոլոր հայրենասերների հանդեպ և որպես խոր հարգանքի հավաստիք՝ իր հայրենիքում մինչև վերջին օրն ապրած բոլոր արցախցիների նկատմամբ։
Նրանց, ովքեր հազարամյակներ շարունակ արարել ու ապրել են Արցախում, պահպանել իրենց ինքնությունն ու մշակույթը և սերունդներին փոխանցել հայրենի հողի հանդեպ սերն ու լուսավոր գալիքի իրենց նվիրական երազանքը։
Անասելի ցավ ու դժբախտություն է Արցախի Հանրապետության հռչակման 35-րդ հանգրվանն այսպիսին տեսնելը։ Բայց թեկուզ այս պայմաններում մենք ունենք անելիք. պաշտպանել Արցախի պատմական, մշակութային և հոգևոր ժառանգությունը, բարձրաձայնել էթնիկ զտման ենթարկված մեր հայրենակիցների իրավունքների մասին և անել ամեն ինչ, որպեսզի Արցախի թեման երբևէ չմարի մեր մտքերում և գիտակցության մեջ:
Շնորհավոր տոնդ, Արցա՜խ...»