Նորք Մարաշ ԲԿ-ն գովազդում է սրտի խնդիր ունեցող 4 տարեկան երեխային ծեծած սրտաբան Կարեն Կուրդովին

Մահվան ողբերգական դեպքերի մասին հրապարակումներից հետո, քաղաքացիներն ահազանգում են, որ Նորք Մարաշ ԲԿ-ն «հիմա էլ գովազդում է՝ Մանկական սրտաբանական թիմին, որի առաջին շարքերում է մանկական սրտաբան Կարեն Կուրդովը», ով հայտնի է սրտի խնդիր ունեցող 4 տարեկան երեխային ծեծելու սկանդալային միջադեպով։ Հրապարակումը տարածում է նաև ԲԿ տնօրեն Միքայել Ադամյանը։

Հիշեցնենք, որ Մանե Ռաֆայելյանը հայտնել էր, որ Նորք Մարաշ բժշկական կենտրոնում էխոսրտագրության հետազոտության ժամանակ մանկական սրտաբան Կարեն Կուրդովը ծեծել է՝ ի ծնե սրտի խնդիր ունեցող 4-ամյա երեխային այն բանի համար, որ երեխան վախեցել է և չի ցանկացել պառկել։ Ավելին, բժիշկ Կարեն Կուրդովը գոռացել է նաև երեխայի մոր վրա և ասել․ «Գնա բոլորին ասա, որ չլսող երեխաների հետ ես սենց եմ վարվում»։
Գրառման մեկնաբանություններում ծնողը մանրամասնել էր, որ ծեծելուց հետո «երեխեն սկսեց կապտել․․․ դեմքին առաջացավ hեմատոմա»:

Դեպքի առիթով ձեռք բերված բավարար ապացույցների համակցությամբ՝ երեխայի առողջությանը դիտավորությամբ վնաս պատճառելու հիմքով Կենտրոն և Նորք-Մարաշ վարչական շրջանների քննչականում հարուցվել է քրեական գործ և սրտաբան Կարեն Կուրդովին մեղադրանք է առաջադրվել, իսկ գործը քննվել է քրեական դատարանում (ԵԴ/0654/01/21)։

Չնայած այն հանգամանքին, որ քննչական մարմինն ապացուցել է, որ դեպքը տեղի է ունեցել այնպես, ինչպես այն նկարագրել է երեխայի մայրը, այնուամենայնիվ, աներևակայելի վարքագիծ է դրսևորել Նորք Մարաշ բժշկական կենտրոնի ղեկավարությունը և պաշտոնական պատասխանում՝ փառաբանել 4 տարեկան երեխային ծեծող բժշկին և վիրավորական հեգնանքով խոսել երեխայի ծնողների մասին և մեղադրել «հանիրավի պարսավելու» մեջ։

Այսպես։ ԲԿ-ի պաշտոնական պատասխանում կարդում ենք․ «(...) կրելով բժշկական պատասխանատվություն, (...) իր մասնագիտական պարտքը մինչև վերջ կատարել կարողանալու նպատակով բժիշկ Կուրդովը սաստել է երեխային, ինչը, ցավոք, «հատուկ» մեկնաբանության է արժանացել իրավական տերմինաբանությանը ծանոթ Ավագյանների մոտ (խոսքը երեխայի ծնողների մասին է - խմբ.): Շատ լավ հասկանալով «ընտանեկան իրավաբանական արժանապատվությունը» «փրկելու» ձգտումը՝ հույս ենք հայտնում, որ Ավագյանները ձեռնպահ կմնան ողջ կյանքը մարդկանց առողջությանը նվիրած բժշկին հանիրավի պարսավելուց, (...) մեր իրականությունում կան մարդիկ, որոնք փաստացի կասկածի տակ են դնում բժշկի ու իր մասնագիտական հմտություններն ու գիտելիքները՝ ասելով, որ նա ծեծի է ենթարկել 4 տարեկան երեխային՝ առանց խորամուխ լինելու մանրամասների և, բժշկական լեզվով ասած, «դեպքի հոգեբանության մեջ»:

Ավելին, ԲԿ-ի մամուլի խոսնակ Լենա Սիմոնյանը լրատվամիջոցներից մեկին տված պարզաբանումներում նշել է, որ «ինչ ծնողներն են նկարագրում՝ ծեծուջարդ և այլն, նման բան չի եղել (...)»:

Խմբագրությունն արդեն անդրադարձել է Նորք Մարաշ ԲԿ-ում բժշկական էթիկայից դուրս վարքագծի դրսևորումներին՝ Սկանդալային տեսանյութ. «․․․ գնում եք և այլևս այստեղ չեք վերադառնում»․ Նորք Մարաշ ԲԿ-ի բժիշկները՝ վիրակապվող ծանր բուժառուին և «Մի երկու օրից անե՞նք էդ ստենդը», «եթե ինձ կազատագրեք իրանց հետ շփումից, ուրեմն ազատագրեք»․ սրտաբան Քրիստինե Պողոսյան․ հերթական սկանդալը՝ Նորք Մարաշ ԲԿ-ում (տեսանյութ) հոդվածներում։

Հավելենք, որ Նորք Մարաշ ԲԿ-ում ողբերգական և առեղծվածային մահվան դեպքերը, բուժառուների հետ բժշկական էթիկայից դուրս վարքագծի դրսևորումները, բազմամիլիոն չարաշահումների, կասկածելի գործարքների, մեկ անձից գնումների, քրեական գործերի վերոնշյալ շղթան գրեթե ամբողջությամբ սկսվել է տնօրեն՝ Միքայել Ադամյանի նշանակումից հետո։

Խմբագրությունն ուսումնասիրում է այս միջադեպերի, ինչպես նաև ստացված նոր տեղեկությունների մանրամասները և առաջիկայում կներկայացնի սկանդալային նոր բացահայտումներ՝ Նորք Մարաշ ԲԿ-ի տնօրինության և բուժանձնակազմի մի քանի ներկայացուցիչների՝ առեղծվածային գործարքներում ներգրավվածության մասին։

Հիշեցնենք, որ խմբագրությունը վերոնշյալ ԲԿ-ի և բժիշկների մասին մինչ օրս հրապարակել է 10 հոդված՝

1) «Մահվան ելքով վիրահատությունից հետո հաղորդում է ներկայացվել բժիշկներ՝ Գագիկ Հեբոյանի, Քրիստինե Պողոսյանի, Հովհաննես Ավդալյանի, Գագիկ Հապետյանի, Էդուարդ Պետրոսյանի, Արա Անանյանի դեմ»,

2) «Նորք Մարաշ ԲԿ-ն քաղաքացու մահվանից 26 օր անց է միայն «ցավակցություն» հայտնում»,

3) «Նույն անձնակազմը ինձնից խլեց մայրիկիս»․ հանրությունը՝ ողբերգական միջադեպին մասնակից բժիշկների մասին,

4) «Հարուցվել է քրեական գործ»․ Քննչական կոմիտեն՝ Գ․ Հեբոյանի, Ք․ Պողոսյանի, Ա․ Անանյանի, Է․ Պետրոսյանի, Հ․ Ավդալյանի, Գ․ Հապետյանի մասնակցությամբ մահվան ելքով դեպքի մասին,

5) Սկանդալային տեսանյութ. «․․․ գնում եք և այլևս այստեղ չեք վերադառնում»․ Նորք Մարաշ ԲԿ-ի բժիշկները՝ վիրակապվող ծանր բուժառուին,

6) «Կնոջս մահվան մեղավորները Գագիկ Հեբոյանն ու Քրիստինե Պողոսյանն են»․ Մհեր Խալաթյան,
7) «Մի երկու օրից անե՞նք էդ ստենդը», «եթե ինձ կազատագրեք իրանց հետ շփումից, ուրեմն ազատագրեք»․ սրտաբան Քրիստինե Պողոսյան․ հերթական սկանդալը՝ Նորք Մարաշ ԲԿ-ում (տեսանյութ),

8) Քրեական գործերի, կասկածելի գործարքների և խախտումների տակ կքած Միքայել Ադամյանը մեղադրում է լրատվամիջոցին՝ իրական փաստեր հրապարակելու մեջ,

9) «Գագիկ Հեբոյան, քո հրեշ խմբով խլեցիք 27 տարեկան եղբորս կյանքը՝ թողնելով որբ երկու երեխաների, իսկ 25 օրից պետք է ծնվեր երրորդ երեխան»․ Սուսաննա Խաչիկյան,

10) 66 միլիոն դրամի առեղծվածային գործարք՝ Նորք Մարաշ սրտաբանականում։

ՈՒՇԱԴՐՈՒԹՅՈՒՆ

Եթե Դուք (Ձեր հարազատները) տուժել եք վերոնշյալ բժիշկների, կամ ԲԿ-ի այլ աշխատակիցների գործողություններից, կարող եք զանգահարել խմբագրության (010 55 20 59), կամ գրել (ուղարկել ձայնագրություններ, տեսագրություններ, այլ) [email protected] հասցեին, կամ ֆեյսբուքի էջին։
Խմբագրությունը երաշխավորում է տեղեկատվություն տրամադրող անձի գաղտնիությունը։